Sariaren bidez, euskarazko 76 tokiko komunikabidek osatutako sarearen 10 urteko ibilbidea nabarmendu du EITBk, eta euskal esparru komunikatiboaren alde egindako lana aitortu. “Hamarkada batean, TOKIKOMek agerian utzi du tokiko komunikabideak gizartean zein garrantzitsuak diren, tokiko informazioa galdu ez dadin. Gainera, elkarlan-eredu berriak ezarri ditu, tartean EITBrekin, sektorearen hedapena sustatzeko eta etorkizuneko erronkei aurre egiteko”, zabaldu dute ohar batean. Elkarlan horien artean daude, besteak beste, Primeran ikus-entzunezko plataformarako egindako lana eta Saretzen datu-kazetaritzari lotutako egitasmoa.
Alaitz Artolazabal TOKIKOMeko zuzendariak pozik hartu du saria. “Euskara hutsean lanean dabilen hedabideak aitortzea ez da egunero gertatzen. Komunitate sendoa osatzen dugu, baina elkarlan eraginkorrak ezinbesteko ditugu are handiagoa izateko. Txikitasunetik egiten dugun ahalegina EITB moduko enpresa handi batek ikusi izana positiboa da eta indarra ematen digu beste hainbeste urtetan jarraitzeko”.
TOKIKOMek zero kilometroko komunikazioa lantzen du, gertuko komunitatearekin bat egindako, informazioa bertatik bertara lantzeko, inguruko norbanako eta entitateekiko konpromisotik, modu zintzoan eta profesionalean. TOKIKOM markaren atzean 250 profesionaletik gora ari dira lanean, 76 komunikabide baino gehiago biltzen dituen egitasmoan.