Programaren xedeen artean daude euskara gehiago erabiltzea, etxeko hizkuntza euskara izatea, seme-alabekin euskaraz hitz egitea, euskaraz egiteko ohitura galduz gero, hura berreskuratzea, ikastea eta jakin-maila hobetzea; euskaraz bizitzea, azken batean. “Haur Hezkuntzan eta Lehen Hezkuntzan dabiltzan umeen gurasoentzako egitasmoa da, izan ere, umeentzat oso garrantzitsua da gurasoek ere ahalegina egin eta euskaraz egiten dutela ikustea”.
Gurasolagunen taldeak oso txikiak dira, lauzpabost lagunek ostatutakoak. Gutxienez, astean behin eta ordubetez elkartzen dira. “Taldeek non batu erabakitzeko aukera duten arren, eskolaren inguruan elkartu daitezela da helburua, eskolako jolastokian, auzoko parkean… Egitasmoan umeekin batera hartu dezakete parte”. Horri lotuta, bi modu daude gurasolagun izateko: euskara praktikatuz (baldintza da komunikatzeko maila nahikoa izatea); eta gainerako gurasoei euskara praktikatzen lagunduz. Informazio gehiagorako, 747 447 579 telefono-zenbakira deitu daiteke, edo berbalagun.txorierri@gmail.com helbide elektronikora deitu.
Gurasolagun egitasmoa Txorierriko Mankomunitateak antolatzen du hauen laguntzarekin: TOTOAN Txorierriko Euskara Elkarteen Federazioa, Txorierriko Udal-euskaltegia eta Txepetxa AEK euskaltegia. Egitasmoa babesten dute Bizkaiko Foru Aldundiak eta Euskaltzaleen Topaguneak.