Gizarte-sareen bidez jakinarazi dutenez, Sondikako eta Lezamako Udalek adierazpen instituzional bana onartu dute Israel eta Palestinaren arteko gatazkaren harira. Kasu bietan, adierazpena EAJk eta EH Bilduk sinatu dute. Horrela, biziki deitoratzen dituzte “Hamásek Israelgo biztanleriaren kontra egin duen erasoak eragindako heriotzak”, eta horri lotuta, adierazi dute “Israelgo Lehen Ministroak gerrarako egin duen deia eta horren ondorioz palestinarren aurka egin diren erasoak berehala geldiarazi behar direla”. Era berean, palestinarren artean eragindako heriotza guztiak deitoratu dituzte, eta elkartasuna adierazi diete biktima guztiei eta haien familiei.
Bestalde, eskatu dute “biztanleria zibilaren aurkako indarkeria indiskriminatua eteteko eta bahitutako pertsona guztiak askatzeko”. Alde biei ere eskatu diete “nazioarteko legeak eta NBEren ebazpenak errespetatzeko, alde biko eraso hauen biktima guztien giza eskubideak errespetatzeko”. Azkenik, Espainiako Gobernuari eta Europar Batasunari eskatu diete “eskura dituzten baliabide guztiak erabiltzeko, eskualde horretako gatazkak gora egin ez dezan eta bizitza errugabe gehiagorik gal ez dadin, eskualde osoan bakea, segurtasuna eta egonkortasuna finkatzeko konpromiso irmoa hartuta”.
Beste alde batetik, elkarretaratzera deitu dute biharko, urriak 20, Larrabetzun, palestinarrei babesa eta elkartasuna adierazteko. Elkarretaratzea 19:30ean izango da plazan.
