Martxan Arroetako kideek eta buzoia egin dutenek hartu zuten parte. “Jakina denez, Bilboko Burdin Hesiko parte da Gaztelumendi, eta gailurrean gutxienez hormigoizko bunker bat dago. Gainera, han bertan gurutze frankista egon zen, 36ko gerrako irabazleen omenez”, azaldu dute Arroetako kideek. “Buzoiaren diseinuak ezaugarri horiek hartu behar zituen kontuan, eta gaur egungo pentsaera dikotomikoak gainditu. Hori dela eta, Nitugu ipini diogu izen: ni, nire ikuspuntua; tu, tu visión; eta gu, gure ikuspuntu berria”.
Jatorrizko buzoia Lezamako artisau batek egin zuen, eta burdinazkoa zen. “Plastikozko buzoia egin da 3Dn, genituen planoetan eta argazkietan oinarrituta; 3DLan enpresak egin du. Ez da burdinazko buzoia egin, erreplika egiteko zailtasunak direla-eta eta berriro lapurtu ez dezaten. Nolanahi ere, buzoi berriak eta jatorrizkoak itxura bera dute”.