San Joaneko landareetako bat da, eta ekainean topatuko dugu bere goieneko unean. Zizare-belarra landatu, eta uzta lehenengo urtetik izan daiteke ona. Loraldiaren hasieran batu behar da, eta lurretik 30-40 cm-ra ebaki. Zurtoina kendu, eta hostoak eta loreak eta ernamuinak dituzten adarrak gorde behar dira. Erretiluetan sikatu behar dira, ondo aireztatuta eta geruza mehetan ipinita.
Propietate sendagarriak
Emenagogoa da, espasmo-kontrakoa, gernu-antiseptikoa, gosegarri tonikoa eta bermifugoa. Zizare-belarraren infusioa lagungarria da digestio-arazoak eta indigestioa arintzeko eta jateko gogoa pizteko. Era berean, edan daiteke hotzeria eta sukarra arintzeko. Gainera, hilekoaren zikloa erregulatzen du eta minak arintzen ditu. Hilekoa etorri baino zor-tzi egun lehenago hasita, 500 ml infusio edan daiteke egunean, edo ardo sendagarria hartu.
Infusioa: 10-15 g hosto, lore eta ernamuin eta litro bat ur. Infusioa egingo dugu eta 15 minutuan izango dugu beratzen. Mingotsa den arren, ez diogu azukrerik bota behar, eraginkortasuna galdu lezake eta. Zaporea hobetzeko, hala ere, bota ahal diogu menda, garraiska edo mendafina.
Ardo sendagarria: 40 g zizare-belar siku, litro bat ardo zuri gozo eta edalontzi txiki bat pattar. Hogeita bat egunean mazeratuko dugu. Ondoren, iragaziko dugu, botilatu, eta etiketa ipiniko diogu. Hilekoa etorriko zaigula aurreikusitako data baino zortzi egun lehenago hasi gaitezke edaten, bi aldiz egunean (70 ml inguru).
Erabilera kosmetikoak
Landare osoa erabili daiteke zauriak garbitzeko. Gainera, beste landare batzuekin nahasi daiteke, larruazalerako baltsamo sendagarriak egiteko.
Ortuan
Bertute sendagarriengatik eta balio estetikoagatik baliagarria izateaz gainera, lorategiko lur osora zabalduko da eta belar txarrak irtetea ekidingo du.
Bitxikeriak
Txinan, Japonian eta Korean moxibustioirako erabili da milaka urtetan. Praktika horretan, zizare-belarraren hostoak makil txikietan edo konoetan biltzen dira, sua ematen zaie, eta artatu beharreko gorputz-atalaren gainean astintzen dira. Horren ondorioz sortzen da bero leuna, eta uste da bero horrek odola bizkortzen duela, Qi edo energiaren fluxua azkartzen duela eta osasun ona izaten laguntzen duela. Hainbat gaitz arintzeko erabiltzen da, hala nola giharretako mina, artritisa, buruko mina, itolarria, digestio-arazoak, hileko arazoak, antzutasuna eta beroaldiak.
Hainbat kulturek «ametsen belarra» esaten diote zizare-belarrari, eta erabil- tzen dute amets argiak eragiteko, proiekzio astralerako eta botere psikikoak hobetzeko. Zizare-belarra erabilita urrindatzea baliagarria da pertsonak, lekuak, aurak eta energiak arazteko.
Kontraindikazioak
Ez da gomendagarria haurdun daudenek hartzea, erabiltzen delako hileko osasungarria izaten laguntzeko, zirkulazioari eragiteko, umetokia berotzeko, hilekoa etorrarazteko eta gelditutako odola kanporatzeko; eta azken horrekin batera, zurruntasuna, kalanbreak eta mina kentzeko.