Era berean, Txorierriko korridoreko eta Ibaiondo auzoko sarrerak itxi ziren Sondikan, baita Izarza auzoan ere, Olaranzko bidean. Zamudion ere ur-putzuak sortu ziren zenbait lekutan, eta kiroldegia eta Errekaldeko futbol-zelaia itxi ziren, abisu berria eman arte. Bestalde, suhiltzaileek jakinarazi dute ura atera behar izan zutela Zamudioko, Derioko eta Lezamako etxabe batzuetatik. Gainera, auto bat ur-putzu handi batean gelditu zen Derion, ez aurrera, ez atzera, eta auto barruan pertsona bat zegoen. Suhiltzaileek pertsona hori erreskatatu behar izan zuten. Halaber, auto-istripua izan zen Txorierriko korridorean, Derio parean, eguerdian. Segurtasun sailak jakinarazi zuenez, auto bat ur-putzuen eraginez irten zen bidetik, eta langileek motoponpen bidez kendu behar izan zuten errepidean zegoen ura. Zorionez, ez zen zauririk izan, baina auto-ilarak egon ziren arratsaldeko 5ak arte. Ur-putzuek trafikoa zaildu zuten hainbat lekutan.