FACONAUTO federazioak ere egitasmoa goraipatu du, eta iazko datuekin alderatuta, matrikulazioak ia %30 hazi dira. Emisio Gutxiagoko Ibilgailuentzako laguntza-programa horren helburua da “errepide bidezko garraio-sektorearen deskarbonizazioan aurrera egitea, ibilgailu zaharrak emisio gutxiagoko beste batzuekin ordeztuz”, Jaurlaritzaren hitzetan. Gehieneko erosketa-prezioa 40.000 eurokoa da turismo-ibilgailuen kasuan; 75.000 eurokoa hidrogenozko ibilgailuetan; eta ez dago erosketa-prezioaren mugarik furgoneten kasuan.
Eusko Jaurlaritzak hilabete batez luzatu du Emisio Gutxiagoko Ibilgailuentzako laguntza-programarako eskabideak aurkezteko epea. Irailaren 15ean itxi beharrean, orain epea urriaren 15ean itxiko da. Honen bidez, Eusko Jaurlaritzak azken asteetan eskariek izan duten “hazkunde handiari” erantzuna eman nahi dio. Martxoan abian jarri zenetik, 1.760 eskaera jaso izan ditu Jaurlaritzak, eta herritarrek zein autoaren-alorretik jasotako erantzun “aparta” nabarmendu du.