Saskibaloi eskola osatu nahi dute Txorierrin

Ekimen hau Txorierriko saskibaloi zale batzuek bultzatu dute. Azaldu digutenez, gure herrietan zaila da saskibaloi taldeak osatzea, eta horregatik pentsatu dute irtenbide egokia izan ahal dela herri guztiak batu eta Txorierri mailako eskola bat bultzatzea. Egitasmoa edozein adinetako neskei zein mutilei dago zuzenduta eta, futbolaz eta pilotaz gainera, kirola egiteko beste aukera bat ere ematea du helburu. Zehaztu digute eskolak euskaraz emango direla. Egitasmoa maiatzaren 30ean aurkeztuko dute Zamudion, Agirre Lehendakariaren plazan, hain zuzen ere. Baina euria egiten badu, kiroldegira eramango dute ekintza. Goizeko 11etatik aurrera 3x3 txapelketak egongo dira, KO lehiaketak bikoteka, eta Two-ball bikoteka. Antolatzaileek txorierritar guztiak animatu nahi dituzte Zamudiora joatera eta egitasmoa ezagutu eta bertan parte hartzera. Horrela, bada, mahai bat ipiniko dute informazioa emateko eta izen-emateak jasotzeko. Informazio gehiagorako eta izena emateko, helbide elektroniko honetara ere idatzi daiteke: txorierribasketeskola@outlook.es.