Euskaraz irakurtzea sustatzeko kanpaina

Aurreko urteotan legez, Lagatzu Zamudioko euskara elkarteak bat egin du Irakurri, Gozatu eta Oparitu kanpainarekin. Ekintza Euskaltzaleen Topaguneak antolatu du hamahirugarren aldiz eta euskaraz irakurtzea sustatzea du helburu. Maiatzaren 31ra arte egingo da. 

Udal liburutegian liburu bat maileguan hartu, eta hori itzultzen denean % 35eko balioa duen erosketa-txekea lortuko da. Txekea ekainaren 10era arte trukatu ahalko da Zamudio liburu-dendan.

Bestetik, Liburuaren Egunaren haritik, Liburu Rallya antolatu du Zamudioko liburutegiak. Apirilean, hainbat libururen aipuak egongo dira han eta parte-hartzaileek asmatu egin beharko dute zein liburu den. Asmatzen dutenen artean 40 euroko txekeak zozketatuko dira Zamudio liburu-dendan gastatzeko. Zozketa maiatzaren 13an, 18:00etan, egingo da.