Ospakizuna irailean izan zen iaz, baina aurten uztailean egingo da, Euskal Herrian asteburu honetan ez baitago lasterketarik, eta, ondorioz, gidariek Zamudioko saioan parte hartzeko aukera izango dute. Lasterketa 11:00etan izango da hilerriko landan. Guztira, 10 gidari sartuko dira lehian, eta horietako bat Ibai Mozo Zamudio Racing Elkarteko kidea izango da. Ordubete lehenago, 10:00etan, segurtasunez gidatzeko ikastaroa eskainiko da Kotxozulon.
Goizean, umeentzako jolasak antolatuko dira Kultur Etxean, eta, bazkaldu baino lehen, Ambuiberica taldeak berpizte kardiopulmonarrari buruzko ikastaro bat emango du. Herri bazkariaren ostean, 18:00etatik aurrera, bertsolarien txanda izango da. Aurten, Arkaitz Estiballesek, Agin Laburuk, Xabat Galletebeitiak eta Sustrai Colinak gidatuko dute poteoa herriko tabernetatik.