Talde feministak eraso matxistei aurre egiteko protokoloa idatzi du, eta, horretarako, Emagin elkarteak zuzendutako ikastaro batean hartu zuten parte. Ikastaroan 25 emakume ibili ziren, eta jaietan erasorik balego, zelan jokatu erabaki zuten. “Protokoloa jai-batzordean aurkeztu genuen, eta onartu zen”, azaldu dute oharrean. “Brigadaren partaideek bereizgarri bat eramango dute soinean, eta erasoa jasan duen emakumeak haiengana jo ahalko du laguntza eske. Protokoloan erantzun-motak zehaztu dira, eta erasoaren larritasuna kontuan hartuta, erantzun bat edo bestea ematea erabakiko da. Era berean, gune more bat ipiniko da jai-eremuan erasoak salatzeko”.
Jakinarazi dutenez, protokoloaren beste helburuetariko bat prebentzioa da, eta horren harira, herrian dauden puntu beltzak zehazteaz gainera, kanpaina berezi bat ipiniko da martxan. “Hau beste pausu bat da eraso matxistarik gabeko Zamudio baten alde”.