Koronabirusa

Zamudioko liburutegiak etxez etxeko zerbitzua eskainiko du astelehenetik aurrera

Zamudioko liburutegiak liburuak eta DVDak etxez etxe eramateko zerbitzua ipiniko du martxan astelehenean, apirilak 27. Zerbitzua erabili nahi dutenek 944 520 204 telefonora deitu behar dute, edo udalliburutegia@zamudio.eus helbide elektronikora mezu bat idatzi. Liburuak eta DVDak udal-lantaldeak banatuko ditu.

Udalak jakinarazi duenez, lan hori segurtasun osoz egiteko, udal-langileek prestakuntza jasoko dute liburuak eta DVDak desinfektatzeko eta norbera babesteko ekipoak zuzen erabiltzeko. Izan ere, liburu eta DVD bakoitza itzultzen denean, desinfektatu egingo da eta koarentenan ipiniko da denboraldi batean, hurrengo mailegua egiteko moduan egon arte.   

Bestalde, astelehenetik aurrera, liburutegiak zerbitzua online emango die Euskadiko eLiburutegiko mailegu digitalean telematikoki izena eman dutenei. Eusko Jaurlaritzak zerbitzu horretan izena emateko aukera zabaldu zuen martxoan, udal-liburutegietara joan beharrik ez izateko. eLiburutegiaren katalogoa Estatuko liburutegi digitalik handiena da eta hainbat generotako liburuak eskuratzeko aukera ematen du euskaraz, gaztelaniaz eta beste hizkuntza batzuetan. Euskarri digitaleko filmak ere eskura daitezke bertan.

Koronabirusaren azken datuak Txorierrin hemen.