LABek eta ELAk salatu dute Ertzaintzak sindikatuetako ordezkariei eragotzi diela GESTAMPekin bilerara sartzea

Atzo Matriceria Deustoren eta GESTAMPen arteko negoziazio-mahaia laugarren aldiz biltzekoa zen Bilboko Barcelo-Nervion hotelean. LAB eta ELA sindikatuek prentsa-ohar baten bidez jakinarazi dutenez, Matriceria Deustoko delegatuak eta LAB eta ELA sindikatuetako aholkulariek osatutako parte soziala bilerara sartzerakoan, Ertzaintza bertaratutako kide guztiak identifikatzen hasi zen. “Inolako azalpenik eman gabe eta, mahai-negoziatzailearen akta pribatu batean oinarrituta, enpresak emandako izen-zerrenda bat baliatuz, Ertzaintzak zerrendan ez zeuden parte sozialeko kideei eragotzi zien bilerara sartzea. Horiek sindikatuko ordezkariak eta aholkulariak ziren, eta, ondorioz, enpresa-batzordea babesik gabe gelditu zen, eta negoziatzeko beharrezkoa den berdintasun-egoera barik”.

Oharrean azaldutakoaren arabera, bilerara sartu ahal izan zirenek enpresari esan zioten “asmo txarrez” aritzen ari zela eta parte sozialeko kide guztiek parte hartu ezin zutela kontuan hartuta ezinezkoa zela kontsulten aldian bilera egitea. “Bilera normaltasunez egitea ezinezkoa zenez, parte soziala hoteletik atera zen, kide guztiak sartu zitezen ahalegintzeko. Ertzaintzak berretsi zuen kide guztiak ezin zirela sartu, eta ordezkaritza sindikala eta hotelaren aurrean zeuden gainerako langileak kolpatzen hasi zen”.   

Sindikatu bien esanetan, “agerian utzi da enpresak hartutako eta Ertzaintzak betetako erabakien ondorioz ezin zela bilera egin. Beren jokaera dela eta, Ertzaintzak eta GESTAMPek langileen jarduera sindikala eragotzi dute. Horri lotuta, esan beharra dago egoerak ez diola parte sozialari baldintza normaletan egotea Matriceria Deustoko eta GTSeko bilerak egiteko. Gertatutakoa larria da eta erasoa da askatasun sindikalaren, negoziaziorako eskubidearen eta lanpostuak defendatzeko eskubidearen kontra. Inoiz baino gehiago eskatzen diegu GESTAMPi eta Eusko Jaurlaritzari 230 langile kalean utzi nahi dituzten EEEak bertan behera uzteko”.