Bestalde, martxoan edota apirilean zabalik egon arren, eta aurreko urtearekin alderatuta, saltoki eta autonomo batzuen diru-sarrerak % 75 baino gehiago murriztu ziren 2020ko bigarren hiruhilekoan; udalak 25.000 euro bideratuko ditu saltoki horietara, eta 50.000 euro, autonomoen taldera. Autonomoen kasuan, Zamudion erroldatuta egon behar dute, eta egoitza fiskala ere bertan izan.
Udalak bonu-kanpaina ere ipiniko du martxan. Zehatz-mehatz. 3.000 bonu aterako ditu ostalaritzan gastatzeko, eta beste 3.000 bonu, dendetan eta zerbitzuetan gastatzeko. Bonu bakoitzak 35 euro balioko du: erosleak 20 euro ordainduko ditu; eta gainerakoa udalak ipiniko du. Erosleek mota bakoitzeko bonu bi har ditzakete. Bonuak abenduan erosi ahalko dira ADI Zamudio aplikazioaren bidez, eta herritar-txartela erabilita abenduaren 26tik martxoaren 31ra bitartean gastatu. Zamudion erroldatuta ez daudenek ere eskuratu ahalko dituzte bonuak. Udaletxera jo beharko dute horretarako.
Azkenik, udalak arduratsuak izateko deia egin die herritarrei, “egoera lehenbailehen amaitu dadin”.