Udalaren esanetan, lanei esker, “inguruaren irisgarritasuna hobetuko da, handik oinez ibiltzea erraztuko da eta, ondorioz, merkataritza-bizitza hobetuko da, baita herritarren arteko harremana ere”. Bestalde, “inguruko etxebizitzek ez dute garajerik eta lur azpiko aparkalekuak erantzuna emango dio autoak aparkatzeko arazoari. Era berean, herritarrentzako gune berriak atondu ahalko dira, kalean auto gutxiago izango dira eta”. Aparkalekuan auto elektrikoak kargatzeko aukera egongo da.
Udalak aipatutakoaren arabera, “eskola zaharraren eraikinean Kultur Etxea ipintzeak ingurua Zamudio bizitza sozialaren erdigune bihurtu du. Lanek ingurua osatzea ahalbidetuko dute, patio biak plaza bakar bat bilakatuko direlako; plazaren azpian, aparkalekua egongo da”. Plaza estalia izango da eta bertan jolas-gune bat eta nagusientzako gune bioosasungarri bat atonduko dira. “Gune estaliari esker, euria egiten duenean ere egin ahalko dira ekintzak. Gainera, ez da beharrezkoa izango karparik alokatzea kultura- eta jai-ekintzak egiteko”.