Txapelketa ekoizleei zein herritarrei dago zabalik eta aurten 14 bat lagunek hartu dute parte bertan. Kategoria bi egon dira, entsalada-tomatea eta cherrya, eta parte-hartzaile bakoitzak barietate bat baino gehiago aurkezteko aukera izan du. Esandakoaren arabera, 12 barietate inguru aurkeztu dira. Arakaitz Unzueta irabazlea izan da entsalada-tomatearen kategorian; Gabriel Etxebarria, bigarrena; eta Iñaki Astorkiza, hirugarrena. Bestalde, Josu Lopetegik irabazi du tomate cherryen kategorian, eta Joana Lara bigarrena izan da. Gainera, barietate bat baino gehiago aurkeztuta, Lopetegik eta Larak berdindu zuten, eta biek hirugarren postua eskuratu. Irabazleek Zamudioko kooperatiban gastatzeko diru-txartel bana jaso dute saritzat.
Beste aldetik, Nekazamudio azokaren antolatzaileek aurreratu dutenez, hurrengo azoka urriaren 2an izango da eta egun horretan Piper Erreen Eguna egingo dute. Piperrak erosita, azokan bertan erreko dizkigute etxera eramateko.