Zapata Gorriak Zamudioko talde feministak jakinarazi duenez, zenbait ekintza egingo dira Pazko jaietan, emakumeen kontrako erasoak aurreikusteko eta horiei erantzuna emateko. Alde batetik, brigada feminista osatzen dabiltza. Bertan 14 urtetik gorako edozein emakumek har dezake parte. Horretarako, whatsappa bidali behar da 633 918 561 telefono-zenbakira, eta, ahal izanez gero, maiatzaren 27an, 19:00etan, Zamudiotorren egingo den trebakuntza-ikastarora joan. Bestetik, barikuan eta zapatuan puntu morea egongo da jai-gunean eta han informazioa eta laguntza ipiniko da herritarren eskura.
Horrezaz gainera, eraso sexistarik jasanez edo ikusiz gero, aurreko lerroetan esandako telefono-zenbakira deitu ahal izango da gertatutakoa jakinarazteko. Era berean, brigada feministaren kideengana ere jo ahalko da; horiek zapi morea izango dute jantzita. Talde feministak aipatu moduan, txosnetan eta kontzertuetan eraso sexisten kontrako mezuak ipiniko dira, eta herriguneko puntu beltzak identifikatu. “2019an herriko hainbeste emakumeen artean sortu genuen jaietarako protokoloa eramango da aurrera, eta bertan adostutako intentsitate baxuko edo altuko erasoen aurrean erabakiak hartuko dira”, azaldu dute.
Euren esanetan, eraso sexisten kontrako neurriak “jai-batzordearen oniritziarekin eta laguntzarekin” egingo dira. Pazko jaiak ekainaren 3tik 5era ospatuko dira Zamudion.
Txorierriko albiste garrantzitsuak eta azken ordukoak jaso gura dituzu Whatsapp bitartez?
WHATSAPP: Bidali ALTA hitza 747 406 561 telefono zenbakira.
Izan zaitez berriemale ere. Bidali zure argazkiak, bideoak eta berriak.
Hilero lagun birentzako bazkaria zozkatuko dugu alta hartzen dutenen artean (Baserri Antzokian).
