Sevilla “aho batez” hautatu dute. Rodriguezen hitzetan, aintzat hartu dituzte egoitzaren ingurunea eta penintsularen hegoaldera talentua eta inbertsioak erakartzeko gaitasuna. “Egoitza bikaina da eta baldintza guztiak betetzen ditu: eraikin berezia da eta etorkizunean handitu ahal da”, esan du Gobernuaren bozeramaileak. Espainiako Espazio-Agentziak ikerketak egiteko eta teknologia garatzeko ardura izango du eta elkarlanean ibiliko da Europako Espazio-Agentziarekin (ESA) eta Europar Batasunarekin. Agentziak eragin handia izango du ekonomian eta enpleguan. Izan ere, gaur egun espazioari lotutako industriak 50 milioi euroko fakturazioa eta 400 langile ditu Andaluzian. Agentziari esker, 2033rako, 300 milioi euro fakturako dituzte eta 1.600 langile izango ditu.
Lakuako Gobernuak adierazi du Espainiako Gobernuak bigarrenez egin duela Sevillaren alde. “Arraroa da hiria bera aukeratu izana, Industria-bilakaerarako eta Emisioetarako Berrikuntza Zentroa (INCITE) Sevillan ere jartzea erabaki zutelako. Eusko Jaurlaritzak eta sektoreak jarraituko dugu lanean euskal sektore aeroespaziala bultzatzeko”. Arantxa Tapia Ekonomiaren Garapen, Jasangarritasun eta Ingurumeneko sailburuaren esanetan, Euskadik apustu sendoa egin du espazio-ikerketaren alde. Izan ere, ITP enpresaren % 6 erosi du eta hitzarmena sinatu du Airbus enpresarekin, digitalizazioa eta jasangarritasuna lantzeko. Era berean, lehen mailako gaitasun eta azpiegitura zientifiko-teknologiko garrantzitsuak ditu, Zientzia, Teknologia eta Berrikuntzaren Euskal Sarearen kasu.