Pentlatoiak bost proba hauek ditu: 100 kiloko harria jasotzea, gizon-proba, aizkora, txingak eta korrika. “Guk, aldiz, hiru proba egingo ditugu, baina egin beharrekoa handituko dugu. Hau da, pentlatoian harria 25 aldiz altxatzen da, baina guk 30 aldiz altxatuko dugu; gizon-probari dagokionez, bi iltze egin beharrean, sei iltze egingo ditugu; eta hiru kilometroren ordez lau kilometro egingo ditugu korrika”, azaldu digu Bilbaok. Bere ustez, entrenatzen duena eta bere pisua kontuan hartuta, lehenengo bi probetan hobeto ibiliko da, batez ere bigarrenean. “Urte asko dira Bizkaian halako probarik egin ez dela, eta banuen gogoa. Bestalde, Beñatek eta biok nahiko maila antzekoa dugu eta uste dut polita izan daitekeela. Polita eta gogorra, antzean ibiliko garelako eta, jakina, proba gogorrak izango direlako”.