Kultur Etxeko plaza eraberritzeak eta aparkalekua egiteak 1,5 milioi euroko aurrekontua izan dute eta lanak azken 13 hilabeteotan egin dira. “Atzerapena egon da kargatzaile elektrikoen materialak berandu heldu direlako. Aparkaleku berriak herriko beste gune batzuk herritarrentzat erabiltzeko aukera emango digu. Gainera, herrigunearen trafikoa arinduko da, autoak hona zuzenean sartuko direlako, aparkaleku bila herritik ibili beharrean”, esan du Igotz López Zamudioko alkateak.
Aparkalekua doakoa izango da. Momentuz, auto elektrikoak musu-truk kargatu ahal izango dira, baina etorkizunean, ordaindu behar izango da horren truke. Autoak gehienez hiru egun egon ahal izango dira bertan aparkatuta. Zamudioztarrek erabili ahal izango dute, baita kanpokoek ere. “Esate baterako, aireportura doan pertsona batek hemen utzi ahal du autoa”.
Aparkalekuarekin batera, Kultura Etxeko plaza ere berritu da. “1.100 m2-ko esparrua da, han herritarrak batzeko eta ekintzak antolatzeko. Lagatzu Eguna, esate baterako, bertan egingo da. Momentuz ez dago estalkirik, baina estaliren bat jartzeko asmoa dugu”.