Astelehenean epea zabalduko da Zamudioko Zikloturistan izena emateko

Zamudioko Zikloturistaren 35. edizioa irailaren 21ean izango da, eta hango udalak jakinarazi duen moduan, ekintzan parte hartzeko izena ematea irailaren 9tik 18ra arte egongo da zabalik. Izena ematea udal-webgunearen edo ADI Zamudio aplikazioaren bidez egin daiteke.

Ibilbide bi egongo dira. Ibilbide luzea 09:00etan hasiko da eta 24 kilometro izango ditu: Zamudio-Laukariz-Mungia-Bidegorri-Artebakarra-Zamudio. Ibilbide laburra, bestalde, 11:30ean hasiko da eta herrigunean zehar egingo da. Ibilbideak amaituta, umeentzako tailerrak, koadrilen bazkaria eta diskofesta egongo dira. Ekintzak bost euro balio ditu pertsonako, baina tarifa murriztua egongo da hurrengo hauentzat: 18 urtetik beherakoak, pentsiodunak, langabeak, oinarrizko errentaren jasotzaileak eta familia ugariak; horiek hiru euro ordainduko dituzte pertsonako. Kasu bietan, prezioaren barne daude kamiseta, ogitartekoa eta edaria.