Inauterietako lehiaketetan parte hartzeko epea zabalik Zamudion

Aikor aldizkaria 2025ko ots. 18a, 13:09

Zamudioztarrek martxoaren 1ean eta 2an ospatuko dituzte Inauteriak eta, Zamudioko Udalak gizarte-sareen bidez jakinarazi duenez, bi lehiaketa egongo dira: “Zu izar” lehiaketa eta tostada-lehiaketa. Izena ematea zabalik dago eta 27ra arte egin daiteke udaletxean bertan, Ludotekan edo Gaztestazioan, “Zu izar” lehiaketaren kasuan; eta ADI aplikazioaren bidez, udal-webgunean edo udaletxean bertan, tostada-lehiaketaren kasuan.

“Zu izar” txapelketari dagokionez, taldeka zein banaka parte hartu daiteke, eta abesti bat ipiniko bada, izena ematean adierazi behar da. Lau kategoria egongo dira: 0-5 urte, 6-12 urte, 12-18 urte eta +18 urte. Kategoria bakoitzeko hiru sari emango dituzte: 80 euro lehenengoarentzat; 60 euro, bigarrenarentzat; eta 40 euro, hirugarrenarentzat. Tostada lehiaketari dagokionez, bestalde, bi modalitate egongo dira: ogizkoak eta ahizkoak. Kasu honetan ere hiru sari emango dira kategoria bakoitzeko: 80 euro, irabazlearentzat; 60 euro, bigarrenarentzat; eta 40 euro, hirugarrenarentzat. Lehiaketa bietan, dirua herritar txarteletan sartuko da, herriko dendetan, tabernetan eta jatetxeetan gastatzeko.

Beste alde batetik, egitarau zabala antolatu da zapaturako, otsailak 1: tailerra, liburutegian (11:30); dj-a (17:00); “Zu izar” lehiaketa (17:30); dj-a (18:30); De mode quartet ikuskizun ibiltaria (19:00); eta Orekka berbena-taldea. Ekintzak Agirre Lehendakaria plazan egingo dira. Hurrengo egunean, otsailak 2, tostada-lehiaketa izango da 17:00etan, Adintsuen Etxean, eta horren ostean, “txitxarriloa” egongo da Sua taldearen eskutik, eta tostada-txapelketaren sariak banatuko dira.