Gazte Eguna ospatuko dute apirilaren 12an Zamudion

Aikor aldizkaria 2025ko api. 1a, 11:50

30 urte bete ditu Inisitue Zamudioko gazte-asanbladak, eta horregatik, oso berezia izango da aurtengo Zamudioko Gazte Eguna. “Urte hauetan guztietan lanean ibili diren belaunaldiak omentzea gustatuko litzaiguke”, adierazi dute. Hori dela eta, oso egitarau oparoa antolatu dute apirilaren 12rako.

Poteo musikatua hasiko da 13:00etan, eta 15:00etan herri bazkaria izango da. Txartelak erosi daitezke Fernan eta Crazy tabernetan, edo gizarte-sareen bidez eskatu. Gazte-olinpiadak egingo dituzte bazkaldu ostean, eta Sakatu elektrotxarangak herriko bazterrak eta gazteak girotuko du 19:00etatik aurrera. Kontzertuak 22:30ean hasiko dira eta agertokira hurrengo hauek igoko dira: Chulería, joder!, Skabidean, TOC eta Dj Aka Pibikens. Gainera, 23:45etik 00:00etara ekitaldia egingo da.

Inisitueko gazteen esanetan, Gazte Egunaren helburu nagusia da batez ere herriko gazteak, baina haur eta nagusiak ere, elkartzea. “Egun berezia izaten da, bereziki eguna antolatzeko herriko gazte asko inplikatzen dira aurretiko prestatze-lanetan zein egunean bertan. Horregatik, gure arteko harremanak sendotzeko aitzakia ona dela esan dezakegu”. Kartel erakargarria prestatu dute aurten, eta hori ikusita, apirilaren 15ean Zamudiora jende nahikotxo hurbiltzea espero dute, “baina batez ere herriko hainbat gazte elkartzea espero dugu”.