Jose Garate “Foisis” Itoiz talde mitikoko baxu-jotzailea izan zen eta gaur egun Bilboko Orkestra Sinfonikoko (BOS) musikaria da. Foisis elkarrizketatu genuen Ganbara Gizarte Irratian eta horri esker jaso genuen BOSen gonbidapena. Erik Nielsenek zuzenduta, kontzertua egingo zuten Marie-Pierre Langlamet harpalariarekin batera eta gonbidatu gintuzten Euskalduna Jauregian entsegu orokorra ikustera. Gonbidapen bazterrezina iruditu zitzaigun eta antolatze-lanei ekin genien.
Ongietorriaren ostean azaldu ziguten zer ikusiko eta entzungo genuen. Hasteko, BOSek Andres Isasi musikagile bilbotarraren pieza batzuk, 100 urte zituztenak, joko zituen, eta gero Langlamet harpalari frantsesaren musika gozatuko genuen, zeina Ukrainako soinuetan oinarrituta baitzegoen. Era berean, Euskalduna Jauregia eraikitzeko zertan inspiratu ziren azaldu ziguten, eta lekuaren historia kontatu. Askok genekienez, jauregia dagoen lekuan Euskalduna ontziola zegoen lehen eta bertan itsasontzi asko eraikitzen zituzten. Ontziola ixtea erabaki zutenean, protesta eta istilu handiak izan ziren Bilbon. Oso leku adierazgarria da eta omenaldi moduan ikusi daitezke ontzietako zatiak diruditen txapa-ale handiak eta itsasoan gaudela pentsarazten diguten korridore luzeak eta gune zuri-urdin zabalak.
Kontzertua hasi eta berehala konturatu ginen musikak harrapatuta geundela, eta biolin, tronboi eta danborren artean arin-arin pasatu zitzaigun saioak iraun zuen ordubetea. Gainera, eserlekuak musikariengandik oso hurbil ipini zizkigutenez, erreparatu ahal izan genien haien eskuen mugimenduei eta taldekideen koordinazioari eta zehaztasunari. Halaber, izugarrizko abileziaz artista nagusiak jo zuen harpak ere txunditu gintuen.
Euskalduna Jauregitik liluratuta eta oso eskertuta atera ginen. Oso goiz atsegina izan zen eta espero dugu esperientzia behin baino gehiagotan gozatu ahal izatea. PAI Bitartean zerbitzuko erabiltzaileek eta langileek BOSi eskertu nahi diogu emandako aukera.
