Aranzadikoek azaldutakoaren arabera, lan konplexuak izango dira, garbituko den eremua estua delako, eta material arriskutsua topatu litekeelako. Hori dela-eta, lanak aurrera egin ahala, erabakiko dute auzolanerako deia egiten duten edo ez.
Egitasmoak 15.730 euroko aurrekontua du eta hori Larrabetzuko Udalak finantzatuko du, Gogora Memoria Institutuari eskatutako diru-laguntza erabilita. Arkeologi txostena eta Bizkaiko Foru Aldundirako txostena egitea ere badaude proiektuaren barruan.
Azken urteotan hainbat jarduera egin dira Larrabetzuko memoria historikoa berreskuratzeko. “36ko gerraren hainbat aztarna ditugu herrian eta, pixkanaka bada ere, horiek guztiak babestu eta beren balioa azpimarratzeko eginahaletan dabil Larrabetzuko Udala, udalerriko hainbat herritarrekin batera. Hortaz, Gaztelumendiko aztarnen garbiketa norabide horretan egiten den lehen urratsa da”, esan dute Udaletik.
Bestalde, gogora ekarri dute 36ko gerrari eta gerra osteari buruzko informazioa eta lekukotzak jasotzen dabiltzala, eta lan horretan herritarren laguntza beharrezko dutela.