“Pintadek Sondikako herritarren ordezkaritza demokratikoa hartzen duen eraikinari eraso diote; gure etxea da, eta, horregatik, bereziki gaitzetsi behar ditugu. Ez gara kikilduko: bortizkeriaren kontra, irmotasuna. Bortizkeriak bortizkeria baino ez du sortzen. Pintadak egin dituena herriari barkamena eskatzera animatuko nuke. Eta argudioren bat defendatu nahi badu, bere jarrera azal dezala, baina ez udaletxeko ateetan, barruan baizik. Izan ere, ideiak eztabaidatzeari beldur diotenak baino ez dira ateetan gelditzen”, esan du Xabier Zubiaur alkateak.
Asteburu honetan, Sondikako Udalak eta herriko elkarteek Ukrainaren aldeko jaialdia egingo dute. Oharrean azaldu dutenez, agian horregatik egin dituzte pintadak. “Jarraituko dugu bakearen eta giza eskubideen aldeko ekintzak poz-pozik egiten. Gonbit egiten diegu herritarrei, Bizkaikoei zein Txorierrikoei, ekitaldira etortzeko, kirolaz gozatzeko eta bakea aldarrikatzeko. Pedalei eragingo diegu Ukrainaren alde eta oro har giza eskubideen alde. Sondika herri baketsua da”.
Ez da lehen aldia horrelako pintadak Txorierrin agertzen direla. Apirilaren 25ean norbaitek armada errusiarren aldeko pintadak egin zituen Lezamako industriagunean, Txorierriko udalek Ukrainarentzat laguntza batzen den pabiloian, alegia.
