Lehenengo aparkalekua Sondikako aireportuko terminal zaharrean jarriko dute. Udalak mugitzeko arazoak dituzten pertsonei ez die hori gomendatu; bigarrena, Zangroiz industrialdean; eta hirugarrena, Berreteaga industrialdean. Horiek biek sarbideak izango dituzte oinezkoentzat eta erabat irisgarriak dira. Udalak gogorarazi du ezin izango dela Tourraren Sondikako ibilbidean “inolako ibilgailurik” aparkatu, eta herriari “ikuskizuna babesten laguntzea” eskatu dio.
Tourrak eragin handia izango du Txorierriko herri guztietan, baita Sondikan ere. Ekainaren 29an, 8:00etatik aurrera, ez da ibilgailurik Txorierriko etorbidean eta Izartza kalean egon behar; bestela, Udalak isunak jarriko ditu eta garabiak eramango ditu autoak. Uztailaren 1ean, lasterketa 17:00etan pasatuko da Sondikatik eta ibilbideak hartzen dituen errepideak, Txorierriko etorbidea eta Izartza kalea, lau ordu lehenago itxiko dira, publizitate-karabana igaro dadin.
“Ondo pasa eta ongi etorri Sondikara, gure merkataritzaz, ostalaritzaz, txirrindularitzaz eta giro onaz gozatzea espero dugu”, esan du Sondikako Udalak.
