Txupinazoa uztailaren 24an botako dute, arrastiko 7etan. Eta handik aurrera jai giroan murgilduko dira Derioko Aldekona auzoko biztanleak. Bai auzokoak eta bai hara doazen guztiak ere. Uztailean eta abuztuan santuen izendegiari errepasoa egiten dioten jaiak dira Aldekonakoak.
Santiago, Santa Ana, San Ignazio eta San Esteban. Aldekonakoek ez dute aukera bat bera ere galtzen. Jai batzordeak jaiok guztiok batu eta uztailaren 24tik abuztuaren 2ra bitarteko egunetarako egitarau paregabea antolatu du guztientzat, ume, gazte nahiz heldu izan.
Ohiko formulak harrerarik hobea dutenak dira, eta aurtengo jaiek aurrekoetako eskemari jarraituko diote. Besteak beste, Mus eta Briska Txapelketa, idi probak, txitxi-burruntzia, kalejirak eta umeentzako ekitaldiak izango dira jaietan. Gastronomia lehiaketek ere leku berezia izango dute, ohiturari eusteko, hiru txapelketa egingo dira eta. Marmitako Lehiaketa Santiago egunean izango da eta hiru sari banatuko dira guztira: garaikurra eta 100 euro, irabazlearentzat; garaikurra eta 70 euro, bigarren lotzen denarentzat; eta garaikurra eta 20 euro, hirugarrenarentzat. Tortilla Txapelketak ere hiru sari banatuko ditu hurrengo egunean parte-hartzaileen artean: garaikurra eta 60 euro, lehenengoarentzat; garaikurra eta 40 euro, bigarrenarentzat; eta trofeoa eta 20 euro, hirugarrenarentzat. Beste alde batetik, badirudi ragout-a auzotarren artean arrakasta handia lortu duen platera dela, eta San Ignazio egunean Txorierriko III. Ragout Lehiaketa egingo dute hirugarren aldiz.
Plan erakargarria
Euskara ere protagonista izango da aurtengo jaietan. Uztailaren 25ean, Santiago egunean, Euskararen Eguna ospatuko dute Aldekonan, eta goiz-goizetik hainbat ekitaldiz gozatzeko aukera egongo da. Kalejirak hasiera emango dio egunari, eta, lehen aipatutako marmitako lehiaketaz aparte, hauek ere izango dituzte auzoan: meza, dantzen agerraldia, Mus Txapelketa, Txan magoaren emanaldia, berbena eta diskoteka. Dantzen agerraldia inoiz baino hunkigarrigoa eta bereziagoa izango da, ziur asko: Zutik dantza taldea 80ko hamarkadaren hasieran desagertu zen, baina partaide batzuk berriro elkartu dira, jaietan saioa eskaintzeko. Saioa Lainomendi dantza taldearekin batera egingo dute.
Umore sen handia dute Aldekonakoek; lotsarik ez. Beraz, ahalegin handiak egin dituzte aspaldian oso arrakastatsua izan den ekintza berreskuratzen: Mozorro Lehiaketa. Ekintzak lagun asko batu zuen aurreko urte bietan, eta oraingo honetan ere hala izatea espero dute antolatzaileek.
Aldekonako jaiek aipatutakoak baino askoz ekintza gehiago ekarriko dizkigute: berbenak eta diskoteka, Hip-hop kontzertuak, bits jaia, puzgarriak, zirko tailerra eta “Car kross†Auto Lehiaketa, banaka batzuk nabarmentzearren. Jai egitarauan kontsultatu eta auzoraino hurbiltzea plan erakargarria da udari begira.
Jai egitaraua
Uztailaren 24a, barikua
19:00: Txupinazoa
20:00: Txitxi-burruntzia
21.30: Hip-hop kontzertuak
00:00: Diskoteka
Uztailaren 25a, zapatua (Santiago). Euskararen Eguna
11:30: Kalejira
12:00: Meza
13:00: Dantzen agerraldia, Zutik eta Lainomendi taldeen eskutik
14:30: Marmitako Lehiaketa
17:00: Mus Txapelketa
18:30: Txan magoa
20:00: Mamitako Lehiaketako sari banaketa
23:00: Berbena, Trakets taldearen eskutik
03:00: Diskoteka
Uztailaren 26a, domeka (Santa Ana)
11:30: Kalejira
12:00: Hilen meza eta gisatu dastatzea
18:00: Bits jaia
19:30: Tortilla Txapelketa
20:45: Tortilla Txapelketako sari banaketa
21:00: Erromeria, Erdizka Lauetan taldearekin
Uztailaren 30a, eguena
11:00: Kalejira
12:00: Zirko tailerra
17:00: Puzgarriak
22:30: Mozorro Lehiaketa (umeak eta nagusiak)
23:30: Berbena, Bizargorri taldearekin
00:30: Mozorro Lehiaketako sari banaketa
01:00: Berbena, Bizargorri taldearekin
03:00: Diskoteka
Uztailaren 31, barikua (San Ignazio)
11:30: Kalejira
12:00: Meza eta kopaua, zaharrentzat
13:00: Nazioarteko folklorea
15:00: Txorierriko III. Ragout Lehiaketaren aurkezpena
17:30: Ragout Lehiaketako sari banaketa
19:00: Idi probak
21:00: Txokolatada, Arantza ta Pantxo Trio taldeak girotua
Abuztuaren 2a, domeka (San Esteban)
10:00: “Car-Kross†Auto Lehiaketa
12:00: Meza
17:00: Mus eta Briska Txapelketa
18:30: Gorriti eta haren animaliak
20:00: Mus eta Briska Txapelketako sari banaketa
20:30: Txitxi-burruntzia eta diskoteka