Azken urteetan euskal blogintzaren inguruko ikerketa edo analisi sakonik ez da egin. Hori dela eta, aspaldi duten jakin-mina piztu zaie Azkue Fundazioko langileei. Jakin badakite, gainera, euskalgintzan eta internet alorrean badagoela kezka handi bat. Izan ere, ez dago euskarazko blogintzaren egoera islatzen duen ikerketa edo azterketarik. Hau da, informazio falta dago. Beraz, inkesta baliogarria izango da etorkizunerako estrategiak, garapenak eta egitasmo berriak martxan jarri ahal izateko.
Inkesta honelako galderei erantzuten saiatuko da: Zenbat blog daude euskaraz idatzita? Zein gai eta arlo lantzen dira? Zenbat blogari euskaldun daude? Nola daude garatuta? Etekinik sortzen dute? Eta kontsumitzailearen ikuspegitik, nahikoa da blog horiekin? Irakurleen beharrak asetzen dituzte blog horiek? Zein gai gustatuko litzaieke irakurleei euskaraz lantzea?
Inkesta, edozeini zabalik
Inkesta gizarte osora dago zabalik, hau da, edozeinek bete dezake; edozein blogarik edo blogen kontsumitzailek, nahiz eta blogik ez izan; sarean ibiltzen den edozein euskaldunek. Ikuspegi bitatik landu da galdetegia, eta azterketa bikoitza egin nahi da: batetik, une honetan sarean dauden euskarazko blogen izaeraren inguruan sakontzea; bestetik, irakurle edo kontsumitzaileok zein eduki mota kontsumitzen ditugun ezagutzea eta zein behar sumatzen ditugun jakitea.
Bestalde, Azkue Fundazioak Blogetan! Euskal blogariak lehian egitasmoaren bigarren edizioa jarri du martxan duela gutxi. Lehiaketa honetan Argia aldizkaria du laguntzaile. Helburua euskaraz sortzen diren blogak ezagutu, zabaldu eta sustazea da.
Informazio gehiago: http://www.azkuefundazioarenegunkaria.eus/euskal-blogintzari-buruzko-inkesta-lagunduko-gaituzu-datuak-lortzen/