Alex Loustaunau EGAZ Txorierriko gerentearen esanetan, zerbitzuak hainbat urte daramatza erabiltzaileei enpresa berriak sortzeko tresnak eskaintzen. “Helburua da testuinguru lagungarria sortzea, ekintzaileak zein enpresak hazi daitezen, ongizatea eta enplegua sortu ditzaten eta gaur egungo merkatuaren erronkei aurre egiteko behar moduko eskala-ekonomia lortu dezaten”. Horretarako, tutoretza pertsonalizatuen bidez, EGAZ Txorierrik Negozioaren Plana egiteko aukera eskaintzen die erabiltzaileei; hau da, negozio-ideia proiektu egituratua bihurtzeko aukera. Bertan, besteak beste, enpresaren helburu orokorrak eta berariazkoak zehazten dira, helburu horiei heltzeko estrategia, organizazioaren egitura, egin beharreko diru-inbertsioa eta arazoei aurre egiteko konponbideak. Gainera, informazioa ere eskaintzen die forma juridikoei, izapideei eta dirulaguntzei buruz.
Bestalde, EGAZ Txorierrik ekintzaileentzako ikastaroak ere antolatzen ditu, enpresa-kudeaketari lotutako ikastaroa kasu, eta, behin enpresa martxan ipiniz gero, Ekonomia eta Enplegua Sustatzeko Zerbitzuaz baliatzen da ekintzaileei proiektua sendotzen laguntzen jarraitzeko eta helburu berriak ezartzeko.
