Tai Chi. Apiriletik urrira, eguaztenetan eta eguenetan, 11:15etik 12:15era. Izena ematea, Kultur Birikan.
Oporretara joan baino lehen, etxeko lanak egin dituzte Derioko Marikobaso Espazioko kideek eta hainbat ekintza antolatu dituzte irailerako. Horrela, bada, irailaren 10ean herriko artisauen azoka egingo da eta biniloak ipiniko dira. Hilaren 21ean Euskaraldiko bilera irekia (elkarteak eta entitateak) egingo da, eta hilaren 27an Kukuke antzerki eskolaren ate irekiak izango dira. Azkenik, Derioztartu eskola izango da irailaren 29an, eta gizarte-eskubideen txokoa, hilaren 30ean. Ekintzei buruzko informazioa sare sozialen bidez zabalduko dute.
Barikuan, irailak 23, San Migel jaiak hasiko dira Derion eta bertako jai-batzordeak jakinarazi du jai-egitaraua. Jaiek zazpi egun iraungo dute eta, besteak beste, lehiaketak, musika eta umeentzako ekintzak egongo dira; eta batez ere gogoa. Bestalde, aipatu beharra dago aurten txosnagunea Arantzazu kalean ipiniko dela.
Lauroetako jai-batzordea gogotsu ibili da auzoko jaiak prestatzen, sanmigelak normaltasunez berriro gozatzeko. Horrela, egitarau oparoa prestatu dute herritar guztiek ederto pasatu dezaten. Irailaren 29tik urriaren 2ra arte, adin-tarte guztientzako hainbat ekintza egongo dira Loiuko auzoan, besteak beste, mendi-ibilaldia, umeentzako jolasak, musika eta gastronomia. Bestalde, jai-batzordeak bereziki bi ekintza azpimarratu ditu: San Migel eguneko bertso-saioa eta barikuan, irailak 30, Agurtzane eta Jon Elustondo anai-arrebek egingo duten trikiti-emanaldia.