Bizkaiko Foru Aldundiak Bizkaia Repararen bigarren edizioa jarri du martxan, lehen edizioak izandako arrakasta ikusi ondoren. Honen bidez, Aldundiak produktuen konponketa “sustatu” eta hondakinen sorrera “prebenitzea” bilatzen du. Lehenengo edizioan, bonuen %93a saldu zen, 94 saltokik hartu zuten parte eta 14 tona produktu inguru konpondu ziren, hondakin bihurtu ez zirenak. Ekainean Aldundiak kanpainarengatik aintzatespena jaso zuen Hondakinen Prebentzioaren Europako Asteko (EWWR) sarietan, administrazio publikoaren kategoriako Europako lehenengo saria.

Mugarik Gabeko Kazetarien (RSF) eta Avaazen ekimenez bildutako ehunka komunikabidek bat egin dute Gazako kazetari palestinarrak babesteko, nahi dutenak berehala ebakuatzeko, Israelek erreportarien aurka egindako krimenen zigorgabetasuna amaitzeko eta nazioarteko prentsa Zerrendan modu independentean sartzeko.