Astelehenean, azaroak 18, bertsolari gazteen sariketako lehenengo finalaurrekoa izan zen Gernika-Lumoko Elai Alai aretoan. B multzoan, Joseba Ortuzar larrabetzuarra ibili zen Bittor Altuberekin batera Ai Zapotxin taldean, baina ez zuten puntu nahikorik eskuratu finalera sailkatzeko. Ai Zapotxin taldeaz gainera, Team Rocket eta Malla 2 taldeak aritu ziren B multzoan, eta Team Rocket taldeko bertsolariek eskuratu zuten puntu gehien. Bestalde, A multzoan, Sagutxo kaskarinak eta Arrakalak loratu taldeak aritu ziren, eta lehenak izan ziren irabazle.    

Azaroaren 23an, 19:00etan, Sueños ikuskizuna gozatzeko aukera egongo da Sondikako Kultur Etxean. Agertokira bederatzi emakume igoko dira, eta bertan txikitatik lagunak diren bederatzi emakumeen istorioa azalduko dute. Lagunak izan arren, harremana bertan behera utzi zuten momentu batean, eta orain berriro batu dira, dantzaren bidez euren beldurrak eta ametsak elkarri –eta publikoari–  kontatzeko.